रुपीनगर-तळवडे परिसरातील ४ आरसीसी बांधकामांवर नोटीस बोर्ड; लवकरच निष्कासन कारवाई
पिंपरी, दि. ५ जून २०२६(प्रजेचा विकास न्युज प्रतिनिधी):- पिंपरी चिंचवड महानगरपालिकेच्या ‘फ’ क्षेत्रीय कार्यालयाने निगडीतील रुपीनगर मेन रोड व तळवडे येथील गजानन हौसिंग सोसायटी परिसरात सुरू असलेल्या चार अनधिकृत आरसीसी बांधकामांवर नोटीस बोर्ड लावून कारवाईचा इशारा दिला आहे.
महापालिकेच्या तपासणीत ही बांधकामे रेड झोनमध्ये तसेच विकास नियंत्रण नियमांचे उल्लंघन करून उभारली जात असल्याचे आढळून आले आहे. संबंधित बांधकामधारकांना नोटीस बजावण्यात आली असून, आवश्यक प्रशासकीय प्रक्रिया पूर्ण होताच निष्कासनाची कारवाई करण्यात येणार आहे.
घर किंवा फ्लॅट खरेदी करण्यापूर्वी सावध व्हा!
महापालिकेने नागरिकांना स्पष्ट आवाहन केले आहे की, कोणतीही मालमत्ता खरेदी करण्यापूर्वी संबंधित बांधकामाची परवानगी, मंजूर नकाशा, बांधकाम परवाना व इतर आवश्यक कागदपत्रांची पडताळणी करणे अत्यावश्यक आहे.
अनधिकृत बांधकामांमध्ये गुंतवणूक केल्यास भविष्यात मोठे आर्थिक व कायदेशीर नुकसान सहन करावे लागू शकते, असा इशाराही देण्यात आला आहे.
नियमभंग करणाऱ्यांना सवलत नाही
शहरातील अनधिकृत बांधकामांवर यापुढेही सातत्याने कारवाई सुरू राहणार असून, नियोजित आणि सुरक्षित शहर विकासासाठी नियम मोडणाऱ्या कोणत्याही बांधकामाला सवलत दिली जाणार नसल्याचे महापालिकेने स्पष्ट केले आहे.
🗣️ आयुक्त डॉ. विजय सूर्यवंशी म्हणाले :
“अनधिकृत बांधकामांबाबत महापालिकेची भूमिका अत्यंत कठोर आहे. विकास नियंत्रण नियम व सक्षम प्राधिकरणाच्या मंजुरीशिवाय उभारण्यात येणारी बांधकामे नागरिकांच्या सुरक्षिततेसह त्यांच्या कायदेशीर अधिकारांनाही बाधा पोहोचवतात. त्यामुळे अशा सर्व बांधकामांवर नियमानुसार कारवाई केली जाईल. नागरिकांनीही मालमत्ता खरेदीपूर्वी सर्व कागदपत्रांची काटेकोर पडताळणी करूनच व्यवहार करावा.”
—
📰 प्रजेचा विकास न्यूज
“जनतेच्या हक्कासाठी, सत्याच्या बाजूने”
