अजिंठानगर,दि.१९ जानेवारी २०२६ (प्रजेचा विकास न्युज प्रतिनिधी):-पिंपरी चिंचवड महानगरपालिकेच्या सार्वत्रिक निवडणूक २०२६ मध्ये रिपब्लिकन पार्टी ऑफ इंडिया (आठवले) व भारतीय जनता पार्टी यांच्या युतीतून भाजपच्या चिन्हावर निवडणूक लढवलेल्या रिपब्लिकन पक्षाचे उमेदवार धर्मपाल यशवंत तंतरपाळे यांनी भरघोस मतांनी दणदणीत विजय मिळवला. त्यांच्या या ऐतिहासिक विजयाबद्दल रिपब्लिकन पक्षाच्या निष्ठावंत नेते व कार्यकर्त्यांच्या वतीने भव्य सत्कार सोहळ्याचे आयोजन करण्यात आले.
हा सत्कार रिपब्लिकन पक्षाचे महाराष्ट्र प्रदेश उपाध्यक्ष बाळासाहेब भागवत यांच्या पक्ष कार्यालयात उत्साहात पार पडला. यावेळी उपस्थित मान्यवरांनी धर्मपाल तंतरपाळे यांच्या विजयाला सामाजिक एकजुटीचे, संघटनात्मक ताकदीचे आणि कार्यकर्त्यांच्या परिश्रमांचे यश असल्याचे सांगितले.
कार्यक्रमास बाळासाहेब भागवत (उपाध्यक्ष, महाराष्ट्र प्रदेश), के. एम. बुक्तर (उपाध्यक्ष, पश्चिम महाराष्ट्र), दिलीप कडलक (मावळ लोकसभा कार्याध्यक्ष), दशरथ ठाणांबीर, विकास कडलक, विक्रम कांबळे, मारुती जकाते, लिंबराज कांबळे (कार्याध्यक्ष), दयानंद वाघमारे, कमल कांबळे (महिला अध्यक्ष), जोगदंड मामा, अजय बखारीया आदी पदाधिकारी व सुमारे १५० कार्यकर्ते उपस्थित होते.
सत्काराला उत्तर देताना नवनिर्वाचित नगरसेवक धर्मपाल तंतरपाळे यांनी जनतेने दाखवलेल्या विश्वासाबद्दल आभार मानले. “हा विजय जनतेच्या अपेक्षांना न्याय देण्याची जबाबदारी वाढवणारा आहे. प्रभागातील मूलभूत सुविधा, सामाजिक न्याय आणि सर्वसमावेशक विकासासाठी प्राधान्याने काम करू,” असा निर्धार त्यांनी व्यक्त केला.
कार्यकर्त्यांच्या घोषणांनी आणि जल्लोषात पार पडलेल्या या कार्यक्रमाने आगामी काळात शहराच्या विकासासाठी भाजप–रिपब्लिकन युती अधिक सक्षमपणे काम करेल, असा विश्वास उपस्थितांनी व्यक्त केला.
