Home ताज्या बातम्या आकुर्डीत रंगला पत्रकार, कलाकारांच्या सन्मानाचा सुरेल सोहळा!

आकुर्डीत रंगला पत्रकार, कलाकारांच्या सन्मानाचा सुरेल सोहळा!

0

‘आपला म्युझिकल ग्रुप’चा ५० वा संगीत महोत्सव उत्साहात; मान्यवरांच्या हस्ते पत्रकार, कलाकारांचा गौरव

आकुर्डीत पत्रकार आणि कलाकारांचा गौरव

पिंपरी, दि. १७ नोव्हेंबर २०२६ (प्रजेचा विकास न्यूज प्रतिनिधी) : संगीताचा सुरेल आविष्कार, गायकांच्या सुमधुर स्वरांची मैफल आणि पत्रकार व कलावंतांच्या सन्मानाने आकुर्डी येथील ग. दि. माडगूळकर नाट्यगृहात एक अविस्मरणीय सोहळा रंगला. ‘आपला म्युझिकल ग्रुप’च्या ५० व्या भागाचे आयोजन नुकतेच मोठ्या उत्साहात करण्यात आले. संगीतप्रेमी रसिकांनी दिलेल्या उत्स्फूर्त प्रतिसादामुळे या कार्यक्रमाला विशेष रंगत आली.

कार्यक्रमाचे आयोजन अनिल घाडगे यांनी केले होते. विजय कांबळे, रणजीत पाटील, विद्या हजारे आणि सुषमा वनारसे यांच्या सहकार्याने हा संगीतसोहळा यशस्वी झाला. कार्यक्रमाच्या पूर्वार्धाचे सूत्रसंचालन सीमा सुतार यांनी केले, तर पत्रकार पुरस्कार सोहळ्याचे सूत्रसंचालन आणि कार्यक्रमाची सांगता नेहा दंडवते यांनी केली.
या सोहळ्यात पिंपरी-चिंचवड महानगरपालिकेच्या उपमहापौर शर्मिलाताई बाबर, नगरसेविका योगिताताई नागरगोजे आणि नगरसेवक तुषार सहाणे यांच्या हस्ते विविध क्षेत्रांत उल्लेखनीय योगदान देणाऱ्या पत्रकारांचा पुरस्कार देऊन सन्मान करण्यात आला.
यामध्ये पत्रकार श्रावण जाधव, अमोल काकडे, बापूसाहेब गोरे, सूरज साळवे, शबनम सय्यद, माधुरी कोराड, अनिल कातळे आणि श्रीधर जगताप यांचा गौरव करण्यात आला. तसेच पर्यावरण क्षेत्रातील योगदानाबद्दल विठ्ठल नाना वाळुंज यांना पर्यावरण पुरस्काराने सन्मानित करण्यात आले.
चित्रपट अभिनेत्री आर्या घारे, दैवशाला घाडगे, आयुब खान आणि अनिल गायकवाड यांना ‘पुणेरी कलारत्न पुरस्कार’ प्रदान करण्यात आला. तर शशिकांत वाडते आणि सीमा पोडाला यांना कलाकार पुरस्कार देऊन गौरविण्यात आले.
संगीताच्या सुरांनी रसिक मंत्रमुग्ध
कार्यक्रमाचे प्रमुख आकर्षण ठरलेल्या संगीत मैफलीत अनिल घाडगे, रणजीत पाटील, विजय कांबळे, संजय मिश्रा, प्रसाद माने, दत्ता लोहार, विकास जगताप, मोहन भस्मे, के. संग्राम, नेहा दंडवते, विद्या हजारे, सुषमा वनारसे, शुभांगी पवार, मंगल लोहर, छाया अय्यर, संगीता खरवडे, विद्या कोकणे आणि सीमा पोडाला या गायकांनी आपल्या सुमधुर गायनाने उपस्थित रसिकांना मंत्रमुग्ध केले.
बालकलाकार दुर्वेश घाडगे, काव्या वडतकर आणि प्रीता पाखरे यांनी सादर केलेल्या नृत्याविष्काराने कार्यक्रमात आणखी रंगत भरली. संगीत, नृत्य आणि कलाविष्कारांच्या संगमामुळे संपूर्ण सभागृहात उत्साहाचे वातावरण निर्माण झाले होते.
नाट्यगृहातील सुविधांबाबत उपमहापौरांकडे मागण्या
कार्यक्रमादरम्यान ग. दि. माडगूळकर नाट्यगृहात भेडसावणाऱ्या विविध अडचणी आणि सुविधांसंदर्भात आयोजकांनी उपमहापौर शर्मिलाताई बाबर तसेच उपस्थित नगरसेवकांसमोर काही मागण्या मांडल्या. या मागण्यांची दखल घेत उपमहापौर बाबर यांनी त्या पूर्ण करण्यासाठी सकारात्मक आश्वासन दिले.
कार्यक्रमाच्या यशस्वी आयोजनासाठी अनिल जगताप, उमाकांत पवार, शिवानंद मगदूम, अजिंक्य पोटे, अनिल बिरादार, मुबारक पानसरे आणि अनिल सौंदडे यांनी विशेष सहकार्य केले. कार्यक्रमाची ध्वनिव्यवस्था महेश यांनी, व्हिडिओ चित्रीकरण शीला लाहिगुडे यांनी, तर छायाचित्रण दत्ता लोहार यांनी सांभाळले.
प्रवेश विनामूल्य ठेवण्यात आलेल्या या कार्यक्रमाला रसिकांनी दिलेल्या भरघोस प्रतिसादाबद्दल आयोजकांनी समाधान व्यक्त केले. ‘आपला म्युझिकल ग्रुप’च्या ५० व्या भागाच्या यशानंतर यापुढील कार्यक्रमही अधिक भव्य आणि दिमाखदार स्वरूपात आयोजित करण्याचा निर्धार आयोजकांनी व्यक्त केला. संगीताचा आनंद आणि समाजातील विविध क्षेत्रांत उल्लेखनीय कार्य करणाऱ्या व्यक्तिमत्त्वांचा सन्मान, अशा दुहेरी उद्देशाने पार पडलेला हा सोहळा उपस्थितांच्या स्मरणात राहणारा ठरला.

NO COMMENTS

LEAVE A REPLY

Please enter your comment!
Please enter your name here

15 + two =

error: Content is protected !!
Exit mobile version