पिंपरी चिंचवड,दि.२७ डिसेंबर २०२५ (प्रजेचा विकास न्युज प्रतिनिधी):- पिंपरी चिंचवड महापालिका निवडणुकांसाठी भारतीय जनता पक्षाच्या उमेदवारांची अंतिम यादी प्रदेश कार्यालयाकडे सादर करण्यात आली असून, भाजपची पहिली उमेदवारी यादी रविवारी (दि. २८) जाहीर होणार असल्याची माहिती भाजपचे पिंपरी चिंचवड निवडणूक प्रचार प्रमुख आमदार शंकर जगताप यांनी दिली आहे.
भाजप पक्षश्रेष्ठींनी विधानसभानिहाय उमेदवारांचा सविस्तर आढावा घेतला असून, मुंबई येथे झालेल्या बैठकीत कोअर कमिटीच्या उपस्थितीत उमेदवारांवर चर्चा करण्यात आली. ज्या प्रभागांमध्ये उमेदवारी निश्चित झाली आहे, त्या नावांना तत्त्वतः मान्यता देण्यात आली असली तरी अंतिम निर्णय पक्षश्रेष्ठींचाच असणार आहे, असे आमदार जगताप यांनी स्पष्ट केले.
निष्ठावंत कार्यकर्त्यांवर अन्याय होणार नाही
आमदार शंकर जगताप म्हणाले की,
“भारतीय जनता पक्ष हा विकासाचे व्हिजन पुढे ठेवून काम करणारा पक्ष आहे. निष्ठावंत कार्यकर्त्यांवर कुठल्याही परिस्थितीत अन्याय होणार नाही, हा भाजपचा इतिहास आहे. उमेदवार यादी जाहीर झाल्यानंतर कोणत्याही प्रभागात नाराजी दिसणार नाही.”
पिंपरी चिंचवड महापालिका निवडणुकीत भाजप सर्वेक्षणाच्या आधारे विजयाची क्षमता असणारे उमेदवार निवडत असून, त्यानुसारच उमेदवार यादी अंतिम केली जात असल्याचे त्यांनी सांगितले.
विरोधकांच्या एकत्र येण्याचा परिणाम होणार नाही
विरोधक कितीही एकत्र आले तरी त्याचा भाजपवर कोणताही परिणाम होणार नाही. भाजपचे उमेदवार निश्चितपणे विजयी होतील, असा विश्वास व्यक्त करत आमदार जगताप म्हणाले की,
“भारतीय जनता पक्ष हा जगातील सर्वात मोठा संघटनात्मक पक्ष आहे. विकासाचे व्हिजन घेऊन कोणी पक्षात काम करण्यास इच्छुक असेल, तर भाजपकडून त्याचे स्वागतच केले जाते.”
‘थम्पिंग मेजॉरिटी’ने भाजप विजयी होणार
“प्रथम राष्ट्र, नंतर पक्ष आणि मग आपण” या विचारावर भाजपचे काम आधारित असून, पक्षाचा आदेश हाच अंतिम असतो. तिकीट जाहीर होईपर्यंत नाराजी असू शकते, मात्र आदेश आल्यानंतर प्रत्येक कार्यकर्ता एकदिलाने कामाला लागतो, असेही त्यांनी नमूद केले.
पिंपरी चिंचवडमध्ये भाजपकडे इलेक्टिव्ह मेरिट असणाऱ्या उमेदवारांची संख्या मोठ्या प्रमाणात असून, त्यामुळे यावेळी भाजप ‘थम्पिंग मेजॉरिटी’ने महापालिकेत सत्ता स्थापन करेल, असा विश्वास आमदार शंकर जगताप यांनी व्यक्त केला.
कमळ फुलविण्यासाठी एकदिलाने काम
उमेदवार यादी जाहीर झाल्यानंतर सर्व कार्यकर्ते एक विचाराने, एक दिलाने काम करतील आणि पिंपरी चिंचवड महापालिकेत कमळ फुलविल्याशिवाय राहणार नाहीत, असे आवाहनही त्यांनी केले.
– शंकर जगताप
निवडणूक प्रचार प्रमुख
आमदार, पिंपरी चिंचवड शहर
