पिंपरी-चिंचवड, दि. ८ जुलै (प्रजेचा विकास न्यूज प्रतिनिधी): अतिवृष्टीमुळे चिंचवड विधानसभा मतदारसंघातील अनेक भागांमध्ये वीजपुरवठा विस्कळीत झाल्याच्या पार्श्वभूमीवर चिंचवड विधानसभा मतदारसंघाचे आमदार मा. श्री. शंकर पांडुरंग जगताप यांनी परिस्थितीचे गांभीर्य लक्षात घेऊन महावितरणच्या वरिष्ठ अधिकाऱ्यांसह पिंपरी-चिंचवड महानगरपालिका, स्थापत्य विभाग, आपत्ती व्यवस्थापन विभाग आणि बांधकाम विभागाच्या संबंधित अधिकाऱ्यांची तातडीची आढावा बैठक घेतली. बैठकीत वीजपुरवठा पूर्ववत करण्याच्या कामाचा सविस्तर आढावा घेण्यात आला. महावितरणला आवश्यक ते अतिरिक्त मनुष्यबळ व यंत्रणांचे सहकार्य तात्काळ उपलब्ध करून देण्याच्या सूचना देत सर्व संबंधित विभागांनी परस्पर समन्वय साधून युद्धपातळीवर काम करण्याचे निर्देश त्यांनी दिले. तसेच, आज संध्याकाळपर्यंत संपूर्ण परिसरातील वीजपुरवठा सुरळीत होईल, असा विश्वास यावेळी व्यक्त करण्यात आला.
यानंतर आमदार शंकर जगताप यांनी किवळे, रावेत, मामुर्डी आणि विकासनगर परिसरातील वीज व पाणीपुरवठ्याच्या समस्यांचाही सविस्तर आढावा घेत संबंधित विभागांना तातडीने उपाययोजना करण्याचे निर्देश दिले.
यावेळी महावितरण, पिंपरी-चिंचवड महानगरपालिका, पाणीपुरवठा विभाग, विद्युत विभाग आणि अग्निशमन विभाग यांनी परस्पर समन्वयाने कार्य करून नागरिकांना त्वरित दिलासा द्यावा, असे स्पष्ट निर्देश देण्यात आले. तसेच परिसरातील वीज उपकेंद्रे अधिक सक्षम करणे, ड्रेनेज व्यवस्था सुधारणे आणि नियमित व पुरेशा पाणीपुरवठ्याची प्रभावी व्यवस्था उभारण्याबाबत संबंधित अधिकाऱ्यांना सूचना करण्यात आल्या.
महावितरणच्या वरिष्ठ तसेच निवृत्त अनुभवी अधिकाऱ्यांशी समन्वय साधून जुन्या वीजवाहिन्या, तांत्रिक अडचणी आणि वारंवार उद्भवणाऱ्या समस्यांवर कायमस्वरूपी उपाययोजना करण्यावर भर देण्यात आला. आपत्कालीन परिस्थितीत नागरिकांना महावितरणच्या अधिकारी व कर्मचाऱ्यांशी संपर्क साधण्यात येणाऱ्या अडचणी लक्षात घेऊन संपर्क व्यवस्था अधिक सक्षम करण्यासाठी आवश्यक सुविधा उपलब्ध करण्याबाबतही सूचना करण्यात आल्या.
नागरिकांना अखंड व सुरळीत वीजपुरवठा उपलब्ध करून देणे हे सर्वोच्च प्राधान्य असल्याचे आमदार शंकर पांडुरंग जगताप यांनी स्पष्ट केले. तसेच सुरू असलेल्या दुरुस्तीच्या कामांना गती देऊन वीजपुरवठा लवकरात लवकर पूर्ववत करण्यासाठी सर्व यंत्रणांनी प्रभावी समन्वयाने काम करण्याचे निर्देश दिले.
