४२, २१, १० आणि ५ किलोमीटरच्या स्पर्धांचा समावेश; देश-विदेशातील धावपटू सहभागी होणार, जागतिक मॅरेथॉन कॅलेंडरमध्ये स्थान मिळविण्याचा महापालिकेचा प्रयत्न

पिंपरी, दि. १९ नोव्हेंबर २०२६(प्रजेचा विकास न्युज प्रतिनिधी) :- औद्योगिक नगरी म्हणून देशाच्या नकाशावर ठसा उमटविणाऱ्या पिंपरी-चिंचवड शहराची आता जागतिक क्रीडा क्षेत्रातही स्वतंत्र ओळख निर्माण करण्याच्या दिशेने महापालिकेने महत्त्वाचे पाऊल उचलले आहे. येत्या १० जानेवारी २०२७ रोजी शहरात ‘पीसीएमसी ग्रँड मॅरेथॉन’चे आयोजन करण्यात येणार असून, या स्पर्धेच्या माध्यमातून पिंपरी-चिंचवडला आंतरराष्ट्रीय क्रीडा नकाशावर स्थान मिळवून देण्याचा महापालिकेचा मानस आहे.
या मॅरेथॉनमध्ये ४२ किलोमीटर फुल मॅरेथॉन, २१ किलोमीटर हाफ मॅरेथॉन, १० किलोमीटर आणि ५ किलोमीटर अशा चार गटांचा समावेश असणार आहे. स्थानिक धावपटूंसह राष्ट्रीय आणि आंतरराष्ट्रीय स्तरावरील धावपटूंना सहभागी होण्याची संधी मिळणार आहे. विशेष म्हणजे, या स्पर्धेचा समावेश जागतिक मॅरेथॉन कॅलेंडरमध्ये व्हावा, यासाठीही महापालिका प्रयत्नशील आहे.
या आयोजनासंदर्भात महापौर रवि लांडगे आणि महापालिका आयुक्त डॉ. विजय सूर्यवंशी यांनी पत्रकार परिषदेत माहिती दिली. महापौर लांडगे म्हणाले की, पिंपरी-चिंचवडची ओळख आजवर औद्योगिक प्रगतीमुळे देशभरात निर्माण झाली आहे. आता क्रीडा क्षेत्रातही शहराला जागतिक स्तरावर नवी ओळख मिळवून देण्याचा आमचा प्रयत्न आहे. या मॅरेथॉनमुळे तरुणाईसह सर्वसामान्य नागरिकांना आरोग्यदायी जीवनशैलीची प्रेरणा मिळेल. देश-विदेशातील धावपटूंना आकर्षित करणारी ही स्पर्धा शहराच्या लौकिकात भर घालणारी ठरेल.
आयुक्त डॉ. विजय सूर्यवंशी यांनी सांगितले की, ‘पीसीएमसी ग्रँड मॅरेथॉन’चे आयोजन आंतरराष्ट्रीय दर्जाच्या नियोजनानुसार करण्यात येणार आहे. स्पर्धेच्या आयोजनासाठी अनुभवी संस्थेची मदत घेतली जाणार असून, नोंदणी आणि व्यवस्थापनासाठी आवश्यक मानकांची अंमलबजावणी केली जाईल. विविध अंतरांच्या स्पर्धांमुळे सर्व वयोगटांतील धावपटूंना सहभागी होता येणार आहे. शहरात क्रीडा संस्कृती रुजविणे, नागरिकांचे आरोग्य उत्तम राखणे आणि पिंपरी-चिंचवडला जागतिक क्रीडा क्षेत्रात ओळख मिळवून देणे हा या उपक्रमाचा मुख्य उद्देश असल्याचे त्यांनी स्पष्ट केले.
शहरातील प्रमुख मार्गांवरून धावणार मॅरेथॉन
या मॅरेथॉनचा मार्ग शहरातील महत्त्वाच्या चौक आणि रस्त्यांना जोडणारा असणार आहे. डी. वाय. पाटील मैदान येथून स्पर्धेला सुरुवात होऊन धर्मवीर छत्रपती संभाजी महाराज चौक, भक्ती-शक्ती चौक, छत्रपती शिवाजी महाराज चौक, टेल्को रोड, इंद्रायणीनगर, एम्पायर इस्टेट ब्रिज, काळेवाडी चौक, डांगे चौक, संत तुकाराम ब्रिज, रावेत आणि कॅन्टोन्मेंट मार्गे पुन्हा डी. वाय. पाटील मैदान येथे मॅरेथॉनचा समारोप होणार आहे.
ऑनलाइन नोंदणीची सुविधा
या स्पर्धेत सहभागी होऊ इच्छिणाऱ्या धावपटूंना indiarunning.com या संकेतस्थळावर ऑनलाइन नोंदणी करता येणार आहे. स्पर्धेच्या माध्यमातून शहरातील नागरिकांना फिटनेसकडे वळविण्यासोबतच क्रीडा पर्यटनालाही चालना देण्याचा प्रयत्न केला जाणार आहे.
विरोधी पक्षनेते भाऊसाहेब भोईर यांनी या उपक्रमाचे स्वागत करताना सांगितले की, औद्योगिक, शैक्षणिक आणि सांस्कृतिक क्षेत्रात स्वतंत्र ओळख निर्माण केलेल्या पिंपरी-चिंचवडच्या क्रीडा क्षेत्रातील वाटचालीला या मॅरेथॉनमुळे नवी दिशा मिळेल.
अतिरिक्त आयुक्त कुलदीप जंगम यांनीही या उपक्रमामुळे शहरात धावण्याची आणि क्रीडा संस्कृती विकसित होण्यास मदत होईल, असे मत व्यक्त केले. देश-विदेशातील धावपटू, क्रीडाप्रेमी आणि पर्यटकांना पिंपरी-चिंचवडकडे आकर्षित करण्याची संधी या माध्यमातून निर्माण होणार असल्याचे त्यांनी नमूद केले.
या पत्रकार परिषदेस उपमहापौर शर्मिला बाबर, विरोधी पक्षनेते भाऊसाहेब भोईर, शिवसेना गटनेते विश्वजीत बारणे, क्रीडा समिती सभापती कैलास कुटे, क्रीडा समिती सदस्य योगेश लांडगे, धर्मपाल तंतरपाळे, शाम जगताप, तानाजी बारणे, अतिरिक्त आयुक्त कुलदीप जंगम, उपायुक्त अण्णा बोदडे, पंकज पाटील आणि जनता संपर्क अधिकारी प्रफुल्ल पुराणिक उपस्थित होते.
पिंपरी-चिंचवडच्या रस्त्यांवर हजारो धावपटूंचा उत्साह आणि फिटनेसचा संदेश देणारी ही मॅरेथॉन शहराच्या क्रीडा विश्वातील नवी ओळख ठरणार का, याकडे आता क्रीडाप्रेमींचे लक्ष लागले आहे.





