किवळे,दि.१७ जुलै २०२६ (प्रजेचा विकास न्युज प्रतिनिधी):- मीना कॉलनी, विकासनगर (किवळे) परिसरातील मुख्य रस्त्यालगत काही पाळीव कुत्र्यांच्या मालकांकडून बेजबाबदारपणे वर्तन केले जात असल्याची नागरिकांकडून तक्रार करण्यात येत आहे. काहीजण आपल्या पाळीव कुत्र्यांना रोज सार्वजनिक रस्त्याच्या कडेला,सेंट जोसफ मल्यंकारा चर्च परिसरात व घरांसमोरील जागेत शौचासाठी आणतात. मात्र त्यानंतर ती घाण साफ न करता तशीच सोडून दिली जात असल्याने परिसरात दुर्गंधी पसरत असून नागरिकांच्या आरोग्याचा प्रश्न निर्माण झाला आहे.
हा रस्ता परिसरातील नागरिक, ज्येष्ठ नागरिक, महिला आणि लहान मुलांच्या रोजच्या वापराचा आहे. रस्त्यालगतच लहान मुले खेळत असल्याने अनेकदा त्यांच्या पायाला ही घाण लागते. यामुळे संसर्गजन्य आजारांचा धोका वाढत असल्याची चिंता स्थानिकांनी व्यक्त केली आहे.
नागरिकांचे म्हणणे आहे की, प्राणीप्रेम करणे ही निश्चितच चांगली बाब आहे. मात्र प्राणीप्रेमाच्या नावाखाली सार्वजनिक ठिकाणी अस्वच्छता पसरविणे हे कोणत्याही परिस्थितीत योग्य ठरू शकत नाही. पाळीव प्राण्यांची जबाबदारी ही त्यांच्या मालकांची असते. कुत्र्यांनी केलेली विष्ठा तात्काळ उचलून योग्य पद्धतीने विल्हेवाट लावणे ही प्रत्येक जबाबदार मालकाची नैतिक व सामाजिक जबाबदारी आहे.
यामुळे खऱ्या अर्थाने प्राण्यांवर प्रेम करणाऱ्या अनेक जबाबदार प्राणी मित्रांचीही प्रतिमा मलिन होत आहे. काही मोजक्या बेजबाबदार व्यक्तींमुळे सर्वच प्राणीप्रेमींविषयी समाजात चुकीचा समज निर्माण होत असून पाळीव प्राण्यांकडे पाहण्याचा लोकांचा दृष्टिकोनही नकारात्मक होत आहे.
‘प्रजेचा विकास’चे आवाहन :
प्राणीप्रेम म्हणजे केवळ प्राणी पाळणे नव्हे, तर सार्वजनिक स्वच्छतेची जबाबदारीही तितक्याच प्रामाणिकपणे पार पाडणे होय. सर्व पाळीव प्राण्यांच्या मालकांनी आपल्या प्राण्यांची विष्ठा त्वरित साफ करून परिसर स्वच्छ ठेवावा. तसेच स्थानिक प्रशासनाने अशा प्रकारांवर लक्ष ठेवून आवश्यक जनजागृती व नियमांचे काटेकोर पालन करावे, अशी नागरिकांची मागणी आहे.
स्वच्छ परिसर, जबाबदार प्राणीप्रेम आणि नागरिकांचे आरोग्य — ही सर्वांचीच सामूहिक जबाबदारी आहे.
