कचरा संकलनाची गाडी रोज फिरते, मग कचरा रस्त्यावर साचतोच कसा? सीसीटीव्ही तपासून दोषींवर कारवाई करण्याची नागरिकांची मागणी
विकासनगर-किवळे, दि. ३ ऑक्टोबर २०२६ ( प्रजेचा विकास न्युज प्रतिनिधी):- विकासनगर-किवळे येथील विस्डम शाळेकडे जाणाऱ्या रस्त्यावर, साटम फ्लोअर मिल व संतोष बिल्डिंगसमोर पिंपरी-चिंचवड महानगरपालिकेने “येथे कचरा व घाण टाकू नये. टाकल्यास मनपाच्या नियमानुसार दंडात्मक कारवाई करण्यात येईल” असा स्पष्ट फलक लावला आहे. मात्र, मनपाचा हा फलक उभा असतानाच त्याच्या अक्षरशः पायथ्याशी कचऱ्याचा मोठा ढीग साचल्याने महापालिकेच्या आदेशाचीच नागरिकांकडून उघडपणे पायमल्ली होत असल्याचे चित्र समोर आले आहे.
या ठिकाणी प्लास्टिकच्या पिशव्या, खाद्यपदार्थांचे अवशेष, कागद, बाटल्या आणि अन्य प्रकारचा कचरा मोठ्या प्रमाणात पडलेला आहे. त्यामुळे परिसरात दुर्गंधी पसरत असून रस्त्यावरून ये-जा करणाऱ्या नागरिकांना त्याचा त्रास सहन करावा लागत आहे. विशेष म्हणजे, कचरा संकलनासाठी महापालिकेची गाडी परिसरात नियमित फिरत असताना कचरा रस्त्याच्या कडेला येऊन पडतोच कसा? हा प्रश्न आता उपस्थित झाला आहे.
सीसीटीव्ही आहेत तर कारवाई कुठे?
या परिसरात कचरा टाकणाऱ्यांची ओळख पटविण्यासाठी आजूबाजूच्या इमारती व आस्थापनांवरील सीसीटीव्ही फुटेज तपासणे शक्य आहे. त्यामुळे मागील काही दिवसांचे सीसीटीव्ही फुटेज तपासून रात्री-अपरात्री अथवा दिवसाढवळ्या येथे कचरा टाकणाऱ्यांची माहिती मिळवावी आणि संबंधितांवर महापालिकेच्या नियमानुसार दंडात्मक कारवाई करावी, अशी मागणी नागरिकांकडून होत आहे.
केवळ फलक लावून महापालिकेची जबाबदारी संपत नाही. फलकाखालीच कचऱ्याचा ढीग साचत असेल, तर त्या फलकाचा आणि नियमांचा उपयोग काय? असा सवाल आता उपस्थित होत आहे.
लोकप्रतिनिधींचेही दुर्लक्ष?
या ठिकाणापासून जवळच विद्यमान नगरसेवकांचे क्षेत्र असून माजी नगरसेवकांचाही परिसराशी संबंध आहे. त्यामुळे एवढ्या उघडपणे कचरा साचत असताना लोकप्रतिनिधींचे याकडे लक्ष का गेले नाही, असा प्रश्न उपस्थित होत आहे.
तसेच महापालिकेच्या आरोग्य विभागाचे कर्मचारी आणि कचरा संकलन यंत्रणा नियमितपणे परिसरात कार्यरत असताना या ठिकाणी कचऱ्याचा ढीग तयार होईपर्यंत त्याची दखल का घेतली जात नाही, याचेही स्पष्टीकरण महापालिका प्रशासनाने देणे गरजेचे आहे.
जबाबदारी निश्चित होणार का?
महापालिकेने कचरा टाकण्यास मनाई करणारा फलक लावला आहे, कचरा संकलनाची व्यवस्था आहे आणि परिसरात सीसीटीव्हीच्या माध्यमातून कचरा टाकणाऱ्यांची ओळख पटविण्याची शक्यता आहे. तरीही परिस्थिती जैसे थे असेल, तर नियमांची अंमलबजावणी नेमकी कुठे होत आहे? हा मूलभूत प्रश्न आहे.
महापालिका प्रशासनाने या ठिकाणची तातडीने पाहणी करून कचरा हटवावा, परिसराची स्वच्छता करावी, आजूबाजूचे सीसीटीव्ही फुटेज तपासावे, कचरा टाकणाऱ्यांची ओळख पटवून त्यांच्यावर दंडात्मक कारवाई करावी आणि भविष्यात पुन्हा येथे कचरा साचणार नाही यासाठी ठोस उपाययोजना करावी, अशी मागणी नागरिकांकडून होत आहे.
महापालिकेचा फलक सांगतोय—‘कचरा टाकू नका’; पण फलकाखालीच कचऱ्याचा डोंगर उभा राहत असेल, तर आता प्रश्न केवळ नागरिकांच्या बेजबाबदारपणाचा नाही, तर नियमांची अंमलबजावणी करणाऱ्या यंत्रणेच्या कार्यपद्धतीवरही प्रश्नचिन्ह निर्माण करणारा आहे.
प्रजेचा विकास न्युज प्रतिनिधी
विकासनगर-किवळे, पिंपरी-चिंचवड
