पिंपरी, दि.१२ जानेवारी २०२६ (प्रजेचा विकास न्यूज प्रतिनिधी):-पिंपरी-चिंचवड महानगरपालिका सार्वत्रिक निवडणूक २०२६ च्या पार्श्वभूमीवर प्रभाग क्रमांक १६ मध्ये प्रचाराला वेग आला असून नागरिकांचा सक्रिय सहभाग पाहायला मिळत आहे.
प्रभाग क्रमांक १६ मधील निलेश तरस, रेश्मा बापुजी कातळे, ऐश्वर्या राजेंद्र तरस व बाळासाहेब ओव्हाळ यांच्या प्रचारार्थ विकासनगर–किवळे येथील मीना कॉलनी परिसरात स्थानिक रहिवाशांनी स्वतः पुढाकार घेत रस्त्यावर उतरून घरोघरी प्रचार पत्रकांचे वाटप केले.
या उपक्रमादरम्यान रहिवाशांनी परिसरातील विविध नागरी समस्यांबाबत आपसात चर्चा करत निवडणूक प्रक्रियेत जागरूक सहभाग नोंदवला. पाणीपुरवठा, रस्त्यांची अवस्था, स्वच्छता, ड्रेनेज व मूलभूत सुविधांबाबत नागरिकांमध्ये चर्चा रंगताना दिसून आली.
“निवडणूक म्हणजे केवळ मतदान नाही, तर विकासासाठी आवाज उठवण्याची संधी आहे,” अशी भावना अनेक रहिवाशांनी व्यक्त केली. त्यामुळे प्रभाग क्रमांक १६ मध्ये यंदाच्या निवडणुकीत नागरिकांचा सहभाग अधिक ठळकपणे दिसून येत आहे.
