चिखली,दि.०६ जानेवारी २०२६(प्रजेचा विकास न्युज प्रतिनिधी):-पिंपरी चिंचवड महानगरपालिका निवडणुकीत वंचित बहुजन आघाडीला घरातील भांडणाचा फटका बसल्याचे चित्र प्रभाग क्रमांक ११ (घरकुल, अजंठा नगर) येथे स्पष्टपणे दिसून येत आहे.
वंचित बहुजन आघाडीचे अधिकृत उमेदवार सुनील प्रभू गायकवाड यांच्या विरोधात थेट वंचित बहुजन युवा आघाडीचे पिंपरी चिंचवड शहराध्यक्ष विनोद जगन्नाथ गायकवाड यांनी अपक्ष उमेदवारी दाखल करत निवडणूक रिंगणात उडी घेतली आहे.
ही कृती केवळ आश्चर्यकारक नसून, ती उघडपणे पक्षशिस्तीला आव्हान देणारी असल्याचा आरोप वंचित बहुजन आघाडीकडून करण्यात आला आहे. पक्षाच्या अधिकृत उमेदवाराविरुद्ध अपक्ष लढणे म्हणजे पक्षविरोधी कारवाईच असल्याचे स्पष्ट करत,
विनोद जगन्नाथ गायकवाड यांना तत्काळ सर्व पदांवरून मुक्त करून वंचित बहुजन आघाडीतून हकालपट्टी करण्यात आली आहे.
विशेष म्हणजे, शहराध्यक्ष पदावर असताना घेतलेला हा निर्णय कार्यकर्त्यांमध्ये नाराजी आणि संभ्रम निर्माण करणारा ठरला आहे. “पक्ष, चिन्ह आणि अधिकृत उमेदवार यांच्याशी प्रतारणा करणारी ही कृती आहे,” अशी तीव्र प्रतिक्रिया वंचितच्या पदाधिकाऱ्यांकडून व्यक्त होत आहे.
या संपूर्ण प्रकाराची पिंपरी चिंचवड शहरातील सर्व कार्यकर्ते व पदाधिकाऱ्यांनी गंभीर दखल घ्यावी, असे स्पष्ट आवाहन पक्षाकडून करण्यात आले आहे.
निवडणूक काळातच उफाळलेला हा अंतर्गत संघर्ष वंचित बहुजन आघाडीच्या एकसंधतेवर प्रश्नचिन्ह निर्माण करणारा ठरत आहे.
