Home ताज्या बातम्या पिंपरी-चिंचवडमध्ये २१ नोव्हेंबरपासून ‘रंगानुभूती’ राष्ट्रीय महोत्सवाचा सांस्कृतिक जल्लोष!

पिंपरी-चिंचवडमध्ये २१ नोव्हेंबरपासून ‘रंगानुभूती’ राष्ट्रीय महोत्सवाचा सांस्कृतिक जल्लोष!

0
oplus_2097152

पाच राष्ट्रीय नाट्यप्रयोग, दिग्गज रंगकर्मींचे मार्गदर्शन, काव्यात्मक कार्यक्रम आणि चित्र-शिल्प प्रदर्शनाची मेजवानी; ज्येष्ठ रंगकर्मी वामन पंडित यांना यंदाचा ‘रंगानुभूती सन्मान’

पिंपरी, दि. १९ नोव्हेंबर २०२६ (प्रजेचा विकास न्युज प्रतिनिधी):-पिंपरी-चिंचवडच्या सांस्कृतिक विश्वात नवा रंग भरणारा आणि प्रायोगिक रंगभूमीला राष्ट्रीय स्तरावर व्यासपीठ उपलब्ध करून देणारा ‘रंगानुभूती : पूर्वरंग ते उत्तररंग’ हा राष्ट्रीय महोत्सव २१ ते २४ नोव्हेंबर २०२६ या कालावधीत निगडी प्राधिकरण येथील ग. दि. माडगूळकर नाट्यगृहात रंगणार आहे. पिंपरी-चिंचवड महानगरपालिका, थिएटर वर्कशॉप कंपनी आणि पैस कल्चरल फाऊंडेशन यांच्या संयुक्त विद्यमाने आयोजित या चार दिवसीय महोत्सवात नाट्यप्रयोग, अभ्यासवर्ग, परिसंवाद, काव्यात्मक कार्यक्रम तसेच चित्र-शिल्प प्रदर्शनाच्या माध्यमातून रसिकांना वैविध्यपूर्ण सांस्कृतिक अनुभव घेता येणार आहे.

महोत्सवाच्या पूर्वरंगात नांदीसह नाट्यगीतांचा सुरेल सांगितिक कार्यक्रम सादर होणार असून, उत्तररंगात देशभरातील राष्ट्रीय नाट्य महोत्सवांमध्ये निवड झालेले पाच दर्जेदार नाट्यप्रयोग सादर केले जाणार आहेत. याशिवाय दिग्गज रंगकर्मींचे पाच अभ्यासवर्ग, ‘रंगमंथन’ परिसंवाद आणि ज्येष्ठ कवी नारायण सुर्वे यांच्या जन्मशताब्दीनिमित्त महाराष्ट्र राज्य मराठी विकास संस्थेच्या सहकार्याने विशेष काव्यात्मक कार्यक्रमाचे आयोजन करण्यात आले आहे.

यंदाच्या ‘रंगानुभूती सन्माना’साठी कणकवली येथील ज्येष्ठ रंगकर्मी वामन पंडित यांची निवड करण्यात आली आहे. त्यांच्या रंगभूमीवरील योगदानाचा या सन्मानाच्या माध्यमातून गौरव केला जाणार आहे.

या महोत्सवाचे आणखी एक वैशिष्ट्य म्हणजे देशाच्या विविध भागांतील प्रयोगशील कलांना मिळणारे व्यासपीठ. कोलकाता, केरळ, आसाम, ओडिशा, दिल्ली, मुंबई आणि पुणे येथील निवडक नाट्यसंस्था, रंगकर्मी आणि कलाअभ्यासक या महोत्सवात सहभागी होणार आहेत. राष्ट्रीय नाट्य विद्यालयाचे (एनएसडी) संचालक चित्तरंजन त्रिपाठी, ज्येष्ठ नाटककार जब्बार पटेल, ज्येष्ठ नाटककार सतीश आळेकर, भारतीय चित्रपट आणि दूरदर्शन संस्थेचे (एफटीआयआय) माजी विभागप्रमुख प्रा. समर नखाते आणि सावित्रीबाई फुले पुणे विद्यापीठाच्या ललित कला केंद्राचे विभागप्रमुख डॉ. प्रवीण भोळे यांची विशेष उपस्थिती या महोत्सवाला लाभणार आहे.

‘रंगमंथन’ परिसंवादात ज्येष्ठ रंगकर्मी प्रदीप वेलणकर आणि शाम पेठकर यांच्याशी संवाद साधण्याची संधी रसिकांना मिळणार आहे. तसेच चित्रकला आणि शिल्पकलेच्या माध्यमातून पिंपरी-चिंचवडचा सांस्कृतिक वारसा उलगडणारे प्रदर्शनही भरविण्यात येणार आहे. स्थानिक शाळा, महाविद्यालये तसेच सांस्कृतिक आणि सामाजिक संस्थांच्या सहभागातून विविध कार्यशाळा, परिसंवाद आणि उपक्रम राबविले जाणार आहेत.

या राष्ट्रीय महोत्सवाच्या आयोजनासाठी ज्येष्ठ नाटककार जब्बार पटेल, ज्येष्ठ नाटककार सतीश आळेकर आणि प्रा. समर नखाते यांचे मार्गदर्शन व सल्ला लाभला आहे. डॉ. प्रवीण भोळे यांच्या सहकार्याने महोत्सवाची रूपरेषा निश्चित करण्यात आली आहे.

या महोत्सवाची माहिती महापौर रवी लांडगे यांनी पिंपरी येथील महापालिकेच्या मुख्य प्रशासकीय इमारतीत आयोजित पत्रकार परिषदेत दिली.

यावेळी उपमहापौर शर्मिला बाबर, महापालिका आयुक्त डॉ. विजय सूर्यवंशी, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर, अतिरिक्त आयुक्त कुलदीप जंगम, स्थायी समिती सभापती अभिषेक बारणे, सांस्कृतिक समिती सभापती कैलास कुटे, उपायुक्त अण्णा बोदडे, जनसंपर्क अधिकारी प्रफुल्ल पुराणिक तसेच थिएटर वर्कशॉप कंपनी आणि पैस कल्चरल फाऊंडेशनचे संचालक प्रभाकर पवार उपस्थित होते.

रसिकांसाठी पर्वणी; प्रवेश विनामूल्य!

नाटक, कविता, चित्रकला, शिल्पकला आणि वैचारिक संवाद अशा विविध कलाप्रकारांचा संगम असलेला हा महोत्सव सर्वांसाठी विनामूल्य खुला ठेवण्यात आला आहे. त्यामुळे पिंपरी-चिंचवडसह पुणे जिल्ह्यातील नाट्यप्रेमी, विद्यार्थी, कलावंत आणि सांस्कृतिक क्षेत्रातील अभ्यासकांनी या राष्ट्रीय महोत्सवाचा मोठ्या संख्येने लाभ घ्यावा, असे आवाहन महानगरपालिकेच्या वतीने करण्यात आले आहे.

NO COMMENTS

LEAVE A REPLY

Please enter your comment!
Please enter your name here

6 + 10 =

error: Content is protected !!
Exit mobile version