Home ताज्या बातम्या शिरगावच्या साईबाबा ट्रस्टमधील कथित आर्थिक गैरव्यवहारांची चौकशी करा; दोषींवर कारवाईची मागणी

शिरगावच्या साईबाबा ट्रस्टमधील कथित आर्थिक गैरव्यवहारांची चौकशी करा; दोषींवर कारवाईची मागणी

0

दानपेटीतील देणग्या, मौल्यवान दागिने आणि भाडे वसुलीच्या हिशेबावर प्रश्नचिन्ह; १५ डिसेंबरपासून जिल्हाधिकारी कार्यालयासमोर आंदोलनाचा इशारा

पिंपरी, दि. १९ नोव्हेंबर २०२६ (प्रजेचा विकास न्युज प्रतिनिधी) :- मावळ तालुक्यातील शिरगाव येथील प्रसिद्ध श्री साईबाबा पब्लिक चॅरिटेबल ट्रस्ट आणि संलग्न श्री साईबाबा अन्नछत्र मंडळाच्या आर्थिक व्यवहारांमध्ये कोट्यवधी रुपयांचा कथित गैरव्यवहार झाल्याचा गंभीर आरोप ट्रस्टचे संस्थापक व तहहयात विश्वस्त उस्मान दगडू शेख यांनी केला आहे. दानपेटीतील रकमेची अफरातफर, मौल्यवान दागिन्यांच्या हिशेबातील अनियमितता, बनावट ठराव आणि दस्तऐवजांमध्ये फेरफार झाल्याचा आरोप करीत संबंधित विश्वस्तांची सखोल चौकशी करून दोषींवर कठोर कारवाई करण्याची मागणी त्यांनी केली आहे. दरम्यान, प्रशासनाने दखल न घेतल्यास १५ डिसेंबर २०२६ पासून पुणे जिल्हाधिकारी कार्यालयासमोर आंदोलन व उपोषण करण्याचा इशारा तहहयात विश्वस्त समीर शेख यांनी दिला आहे.

यासंदर्भात गुरुवारी (दि. १९) पिंपरी येथे आयोजित पत्रकार परिषदेत उस्मान दगडू शेख, तहहयात विश्वस्त समीर शेख, ॲड. अनघा कुलकर्णी, अक्षय धावरे, रामभाऊ गोपाळे तसेच शिरगाव येथील ग्रामस्थ उपस्थित होते.

२००२ मध्ये ट्रस्टची नोंदणी; विश्वस्त नियुक्तीवरही आक्षेप

समीर शेख यांनी दिलेल्या माहितीनुसार, श्री साईबाबा पब्लिक चॅरिटेबल ट्रस्टची सार्वजनिक विश्वस्त व्यवस्था नोंदणी कार्यालय, पुणे येथे ९ सप्टेंबर २००२ रोजी नोंदणी करण्यात आली असून ट्रस्टचा नोंदणी क्रमांक इ/३६७४/पुणे असा आहे. ट्रस्टमध्ये एकूण सात विश्वस्त असून तत्कालीन आमदार प्रकाश देवळे हे अध्यक्ष होते. त्यांच्यासह प्रसाद दत्तात्रय पाटील, प्रमोद माणिक शेठ दुगड, धोंडीराम बाबा चव्हाण, उस्मान दगडू शेठ, दिगंबर शेठ बाळासाहेब भेगडे आणि प्रा. नारायण सदाशिव फरांदे यांचा विश्वस्त मंडळात समावेश होता.

प्रकाश देवळे यांचे २४ सप्टेंबर २०२५ रोजी निधन झाल्यानंतर त्यांचे नातेवाईक रवी जाधव आणि उमेश कविटकर यांची विश्वस्त म्हणून नावे नोंदविण्यात आल्याचे समीर शेख यांनी सांगितले. मात्र, त्यानंतर संबंधितांनी अन्य विश्वस्तांना विश्वासात न घेता आर्थिक व्यवहार केल्याचा आणि संस्थेच्या कारभारात मनमानी केल्याचा आरोप त्यांनी केला.

दानपेटीतील रोकड, सोने-चांदीच्या दागिन्यांचा हिशेब कुठे?

शिरगाव येथील साई मंदिरात पुणे-मुंबईसह देशाच्या विविध भागांतून तसेच परदेशातूनही भाविक दर्शनासाठी येतात. नवस, संकल्प आणि श्रद्धेपोटी भाविक मंदिरात रोख रक्कम, सोने, चांदी, हिरे व अन्य मौल्यवान वस्तू अर्पण करतात. त्यामुळे मंदिरात दरमहा मोठ्या प्रमाणावर देणग्या जमा होतात. मात्र, या देणग्यांपैकी ठराविक रक्कमच संस्थेच्या बँक खात्यात जमा केली जात असून उर्वरित रकमेच्या व्यवहारांबाबत संशय निर्माण झाला आहे, असे शेख यांनी नमूद केले.

दानपेट्या बेकायदेशीररीत्या उघडून त्यातील रोख रकमेचा अपहार केल्याचा आरोपही त्यांनी केला. बँकेत जमा करण्यात आलेल्या नोटांच्या तपशिलात आणि प्रत्यक्ष नोंदींमध्ये तफावत असल्याचा दावा करण्यात आला आहे. या तक्रारीनंतर दानपेटीतील नोटांच्या तपशिलासंदर्भात कथित बनावट कागदपत्रे तयार करण्यात आल्याचा आरोपही करण्यात आला. संबंधित कागदपत्रांवरील हस्ताक्षर एकाच व्यक्तीचे आणि एकाच दिवशी लिहिल्यासारखे असल्याचा संशय व्यक्त करीत या दस्तऐवजांची तज्ज्ञांकडून तपासणी करण्याची मागणी करण्यात आली आहे.

दुकानांच्या भाडे वसुलीचाही हिशेब संशयाच्या भोवऱ्यात

मंदिर परिसरातील दुकानदारांकडून संस्थेला मिळणाऱ्या भाड्याच्या उत्पन्नाचाही योग्य तपशील उपलब्ध नसल्याचा आरोप विश्वस्तांनी केला आहे. देणग्या, दानपेटीतील रक्कम, मौल्यवान वस्तू आणि दुकानांचे भाडे या सर्व आर्थिक व्यवहारांचे स्वतंत्र लेखापरीक्षण करून प्रत्यक्ष जमा रक्कम आणि नोंदींची पडताळणी करावी, अशी मागणी करण्यात आली आहे.

या प्रकरणी स्थानिक पोलीस प्रशासन तसेच पुणे येथील धर्मादाय आयुक्त कार्यालयाकडे विश्वस्त आणि ग्रामस्थांनी अनेक वेळा लेखी तक्रारी दिल्याचे सांगण्यात आले. मात्र, तक्रारींवर अपेक्षित कारवाई होत नसल्याचा आरोप करण्यात आला. उलट पोलीस प्रशासनातील काही अधिकारी आणि धर्मादाय आयुक्त कार्यालयातील काही अधिकारी संबंधित विश्वस्तांना मदत करीत असल्याचा संशय समीर शेख यांनी व्यक्त केला. या आरोपांचीही स्वतंत्र आणि निष्पक्ष चौकशी व्हावी, अशी मागणी त्यांनी केली.

साई मंदिराचा निधी गावाच्या विकासासाठी वापरा; नदी प्रदूषणाचाही मुद्दा ऐरणीवर

मंदिरात भाविकांकडून श्रद्धेने जमा होणाऱ्या निधीचा उपयोग केवळ संस्थेच्या कारभारापुरता मर्यादित न ठेवता शिरगावच्या स्थानिक विकासकामांसाठीही व्हावा, अशी मागणी ग्रामस्थांनी केली आहे. मंदिराच्या अन्नछत्रातून बाहेर पडणारे दूषित पाणी कोणतीही प्रक्रिया न करता पवित्र नदीत सोडले जात असल्याचा गंभीर आरोपही यावेळी करण्यात आला. त्यामुळे नदीचे प्रदूषण होत असून परिसरातील पर्यावरणावर प्रतिकूल परिणाम होत असल्याचे ग्रामस्थांचे म्हणणे आहे. या बाबीची पर्यावरण विभाग आणि संबंधित प्रशासनाने प्रत्यक्ष पाहणी करून तपासणी करावी, अशी मागणीही करण्यात आली.

१५ डिसेंबरपासून उपोषणाचा इशारा; प्रशासनाच्या भूमिकेकडे लक्ष

ट्रस्टमधील कथित आर्थिक गैरव्यवहार, दानपेटीतील रकमेची अफरातफर, बनावट दस्तऐवज, भाडे वसुलीतील अनियमितता आणि पर्यावरणविषयक तक्रारींची तातडीने चौकशी करावी. संबंधितांविरुद्ध भारतीय न्याय संहिता २०२३ मधील लागू तरतुदींनुसार गुन्हा दाखल करून फौजदारी कारवाई करावी, अशी मागणी पत्रकार परिषदेत करण्यात आली.

प्रशासनाने या तक्रारींची गांभीर्याने दखल घेऊन ठोस कारवाई केली नाही, तर १५ डिसेंबर २०२६ पासून पुणे जिल्हाधिकारी कार्यालयासमोर उर्वरित विश्वस्त आणि शिरगाव ग्रामस्थांच्या सहभागातून आंदोलन व उपोषण करण्यात येईल, असा स्पष्ट इशारा समीर शेख यांनी दिला.

भाविकांच्या श्रद्धेचा विषय असल्याने या प्रकरणाला विशेष महत्त्व प्राप्त झाले आहे. मंदिरात श्रद्धेने अर्पण होणाऱ्या देणग्यांचा विनियोग नेमका कसा होतो, संस्थेच्या आर्थिक व्यवहारांचे लेखापरीक्षण झाले आहे का आणि तक्रारींवर संबंधित यंत्रणांनी काय कार्यवाही केली, या प्रश्नांची उत्तरे आता प्रशासनाला द्यावी लागणार आहेत. दरम्यान, संबंधित विश्वस्तांची बाजू आणि प्रशासनाची अधिकृत भूमिका समोर आल्यानंतरच या प्रकरणातील वस्तुस्थिती स्पष्ट होणार आहे.

NO COMMENTS

LEAVE A REPLY

Please enter your comment!
Please enter your name here

5 × two =

error: Content is protected !!
Exit mobile version