देहुरोड,दि.२९ एप्रिल २०२६(प्रजेचा विकास न्युज प्रतिनिधी) :- देहुरोड शहरात(दि.२८) उशिरा रात्री झालेल्या धाडसी गोळीबाराच्या घटनेने संपूर्ण परिसर हादरला आहे. अज्ञात हल्लेखोरांनी केलेल्या गोळीबारात भाजपचे स्थानिक कार्यकर्ते रमेश रेड्डी गंभीर जखमी झाले होते. मात्र उपचारादरम्यान त्यांचा मृत्यू झाल्याने देहुरोडमध्ये मोठी खळबळ उडाली आहे.
मिळालेल्या माहितीनुसार, अज्ञात हल्लेखोरांनी रमेश रेड्डी यांच्यावर जवळून तब्बल नऊ राऊंड फायर केले. यापैकी एक गोळी त्यांच्या डोक्यात लागून ती आरपार गेल्याने ते गंभीर जखमी झाले. त्यांना तातडीने देहुरोड येथील आधार हॉस्पिटलमध्ये दाखल करण्यात आले होते. मात्र डॉक्टरांनी उपचारापूर्वीच त्यांना मृत घोषित केले.
घटनेची माहिती मिळताच रेड्डी यांचे नातेवाईक व मित्रपरिवार मोठ्या संख्येने रुग्णालयात दाखल झाले. संतप्त नागरिकांनी जुना पुणे–मुंबई महामार्ग जाम करण्याचा प्रयत्न केला. परिस्थिती तणावपूर्ण बनताच देहुरोड पोलिसांनी तात्काळ हस्तक्षेप करत परिस्थिती नियंत्रणात आणली.
दरम्यान, पुढील तपासासाठी रमेश रेड्डी यांचा मृतदेह पिंपरी-चिंचवड येथील यशवंतराव चव्हाण रुग्णालयात हलविण्यात आला आहे. या हल्ल्यामागील नेमके कारण अद्याप स्पष्ट झाले नसून, पोलिसांकडून विविध अंगांनी तपास सुरू आहे.
या घटनेनंतर देहुरोड बाजारपेठेतील व्यापाऱ्यांनी दुकाने तातडीने बंद केली. संपूर्ण परिसरात पोलीस बंदोबस्त वाढवण्यात आला असून सध्या तणावपूर्ण शांतता आहे.
🔍 पोलिस तपास सुरू — आरोपींचा शोध वेगात
पोलिसांकडून हल्लेखोरांचा शोध सुरू असून लवकरच आरोपींना अटक केली जाईल, असा विश्वास व्यक्त करण्यात आला आहे.
