पिंपरी-चिंचवड,दि.१ मार्च २०२६(प्रजेचा विकास न्युज प्रतिनिधी):- रिपब्लिकन पार्टी ऑफ इंडिया (आठवले)पक्षाचे राष्ट्रीय अध्यक्ष रामदास आठवले यांच्या नेतृत्वाला बळकटी देण्यासाठी पिंपरी-चिंचवड शहरात नव्या कार्यकारिणीची घोषणा करण्यात आली. महाराष्ट्र राज्याचे उपाध्यक्ष बाळासाहेब भागवत यांच्या आदेशाने व सहीच्या पत्राद्वारे ही कार्यकारिणी जाहीर करण्यात आली.
यापूर्वी २०२३ मध्ये हंगामी शहराध्यक्षांची नियुक्ती करण्यात आली होती. त्यांचा एक वर्षाचा कार्यकाळ पूर्ण झाल्यानंतर शहरात अध्यक्षपद रिक्त राहिल्याने पक्षात संभ्रमाची स्थिती निर्माण झाली होती. मात्र बाळासाहेब भागवत यांच्या नेतृत्वाखाली शहरातील ज्येष्ठ पँथर कार्यकर्ते आणि नव्या पिढीतील कार्यकर्ते यांना एकत्र आणत नव्या-जुन्यांची सांगड घालून ही कार्यकारिणी स्थापन करण्यात आली.
बैठकीत पुढील पाच वर्षांसाठी सुस्पष्ट नियोजन करून शहरात पक्षाची भक्कम ताकद उभी करण्याचा संकल्प करण्यात आला. आमदारकी, खासदारकी आणि आगामी महापालिका निवडणुकीत पिंपरी-चिंचवडमधून सर्वाधिक योगदान देण्याचा निर्धार यावेळी व्यक्त करण्यात आला.
बाळासाहेब भागवत म्हणाले, “मी अनेक वर्षांपासून पक्षात कार्यरत आहे. पक्षाची वाढ जुन्या कार्यकर्त्यांना सोबत घेतल्याशिवाय शक्य नाही. रिपब्लिकन पक्ष हा मोजक्या लोकांसाठी नसून सर्वांसाठी आहे. त्यामुळे सर्वांना न्याय देत, सर्वांना सोबत घेऊन आम्ही पक्ष अधिक मजबूत करू.”
नवनिर्वाचित पदाधिकारी पुढीलप्रमाणे:
अध्यक्ष – विलास कांबळे
सरचिटणीस – दयानंद वाघमारे
उपाध्यक्ष – बाळासाहेब जोगदंड
उपाध्यक्ष – रमेश गजरमल
उपाध्यक्ष – विशाल आप्पा चंदू कदम
उपाध्यक्ष – रघु गव्हाळे
उपाध्यक्ष – प्रकाश बुक्तर
पक्षप्रवक्ते – भारत बनसोडे
कार्याध्यक्ष – बाळासाहेब रोकडे
संपर्कप्रमुख – विकास कडलक
संघटक – पांडुरंग मोहन कांबळे
सदस्य – सुंदर कांबळे
प्रसिद्धी प्रमुख – अभिजीत सिद्धार्थ चव्हाण
अध्यक्षपदासाठी सम्राट जकाते, दयानंद वाघमारे, विलास कांबळे, दिलीप कडलक, दिलीप साळवे, सुंदर कांबळे, साहेबराव बचुटे, दत्ता टानाबिर आदींनी अर्ज केले होते. मात्र सर्वांनी एकमताने अध्यक्षपदाचे अधिकार बाळासाहेब भागवत यांना देत विलास कांबळे यांची निवड मान्य केली.
या बैठकीस के एम बुक्तर पश्चिम महाराष्ट्र उपाध्यक्ष, पश्चिम महाराष्ट्र उपाध्यक्ष अंकुश कानडे, सम्राट जकाते, कमल कांबळे (महिला शहराध्यक्ष), दत्ताभाऊ गायकवाड (रिपाई व्यापारी आघाडी उपाध्यक्ष), लिंबराज कांबळे, भाऊसाहेब रोकडे यांच्यासह २०० हून अधिक कार्यकर्ते उपस्थित होते.
लवकरच शहरातील सर्वात मोठी जम्बो कार्यकारिणी जाहीर करण्यात येणार असल्याची माहिती देण्यात आली.
पिंपरी-चिंचवडमध्ये रिपब्लिकन पक्ष नव्या जोमाने संघटन उभारणीस सुरुवात करत असून आगामी निवडणुकांमध्ये पक्षाचे बळ निर्णायक ठरणार, असा विश्वास यावेळी व्यक्त करण्यात आला.
