अहिल्यानगर,दि.२७ डिसेंबर २०२५ (प्रजेचा विकास न्युज प्रतिनिधी): – अहिल्यानगर महानगरपालिका सार्वत्रिक निवडणूक २०२५–२६ च्या पार्श्वभूमीवर शिवसेना उद्धव बाळासाहेब ठाकरे पक्षाकडून प्रभाग क्रमांक १७ (अ) अनुसूचित जाती गटातून सिद्धांत संजय कांबळे यांनी निवडणूक लढवण्याची अधिकृत घोषणा केली आहे. “नवीन चेहरा… जुना विश्वास” या ब्रीदवाक्याने ते थेट जनतेशी संवाद साधत आहेत.
सिद्धांत कांबळे यांचे वडील संजय कांबळे हे गेल्या ३५ वर्षांपासून सामाजिक चळवळीत सक्रिय असून, स्वाभिमानी आणि निस्वार्थीपणे समाजसेवा करत आले आहेत. कोणतेही राजकीय पाठबळ नसताना त्यांनी निर्भीडपणे अनेक सामाजिक उपक्रम राबवले. २००३ मध्ये त्यांनी महानगरपालिका निवडणूकही लढवली होती. रात्रंदिवस तत्पर राहून केवळ शहर, जिल्हा नव्हे तर महाराष्ट्र आणि भारतभर फिरत शिव–शाहू–फुले–आंबेडकर विचारांचा वारसा जपण्याचे काम त्यांनी सातत्याने केले आहे.
सर्व धर्मीय वधू–वर सूचक मंडळ, सामुदायिक विवाह सोहळे, गोरगरिबांच्या मुला-मुलींचे संस्थेमार्फत विवाह लावणे, असे अनेक समाजोपयोगी उपक्रम त्यांच्या कार्याची साक्ष देतात.
दरम्यान, आजवर झालेल्या महानगरपालिका निवडणुकांमध्ये पाणी, वीज, ड्रेनेज, रस्ते या प्रश्नांपलीकडे ठोस विकास दिसत नसल्याची खंत व्यक्त करत, सिद्धांत कांबळे यांनी वेगळा विकास दृष्टिकोन मांडला आहे. “पुन्हा पुन्हा तेच प्रश्न, तोच प्रचार नव्हे; तर नियोजनबद्ध विकास हवा,” असे ते सांगतात.
त्यांच्याकडे संपूर्ण विकास आराखडा तयार असून, वडिलांचा ३५ वर्षांचा अनुभव आणि स्वतःची तरुणाईची ऊर्जा यांची सांगड घालून प्रभागाचा सर्वांगीण विकास करण्याचा त्यांचा निर्धार आहे.
युवक-युवतींसाठी अभ्यासिका, UPSC/MPSC स्पर्धा मार्गदर्शन केंद्र, झोपडपट्टीधारकांना हक्काचे घर, अनाथ मुला-मुलींसाठी निराधार योजना, तसेच विधवा व ज्येष्ठ नागरिकांसाठी शासकीय मदत मिळवून देण्यासाठी ते प्रयत्नशील राहणार आहेत.
“स्वाभिमानी, निस्वार्थी आणि अन्यायाविरुद्ध लढणारा एक युवक म्हणून जनतेची सेवा करण्याची संधी द्यावी,” अशी नम्र विनंती त्यांनी मतदार बंधू-भगिनींना केली आहे.
प्रभाग क्रमांक १७ (अ) मधील मतदार एक मोलाचे दान — मतदान — देऊन महापालिकेत काम करण्याची संधी देतील, अशी अपेक्षा त्यांनी व्यक्त केली आहे.
