पिंपरी,दि.०९ सप्टेंबर २०२५(प्रजेचा विकास न्युज प्रतिनिधी):-सकाळी लवकर कामावर किंवा शाळेकडे निघालेल्या नागरिकांना गेल्या काही दिवसांपासून एक वेगळंच दृश्य पाहायला मिळतंय. पिंपरी चौक, निगडी भोसरी परिसर, आकुर्डी स्टेशन परिसर दाट धुक्याने झाकलेला दिसतोय. इतकंच नव्हे तर पुणे-मुंबई महामार्गावर गाडी चालवणं म्हणजे धुक्याशी थेट लढाईचं काम झालंय.हिवाळा यायच्या आधीच शहर दाट धुक्यात हरवलंय. पहाटेच्या वेळी बाहेर पडलेल्या नागरिकांना जणू निसर्गाने गुपचूप पांढरी चादर पसरून दिली आहे. विकासनगर, किवळे, रावेत, मामुर्डी, देहुगाव, देहुरोड परिसर गेल्या काही दिवसांपासून सकाळी लवकर धुक्याने व्यापलेला दिसतोय.
धुक्यामुळे समोरचं वाहन दिसेनासं झाल्याने सकाळच्या पीक अवर्समध्ये ट्रॅफिकची समस्या आणखी गंभीर झाली आहे. “सकाळी ऑफिसला जाताना आकुर्डी फाटक पार करताना पाच फूट पुढचं काही दिसतच नव्हतं. ब्रेक मारला की मागचं वाहन धडकेल की काय, अशी भीती होती,” असं एका वाहनचालकाने सांगितलं.विकासनगर-किवळे फाटा, रावेत-मंबई रस्ता आणि देहुरोड कॅन्टोन्मेंट परिसरात सकाळी वाहन चालवणं म्हणजे मोठं आव्हान ठरतंय. “मामुर्डीहून कामावर निघालो तर दहा फूट पुढचं काही दिसतच नव्हतं. गाड्या एकदम सावकाश चालवाव्या लागत आहेत,” असं दुसर्या रहिवाशाने सांगितलं.
पिंपरी, चिंचवड, आकुर्डी स्थानकावरून लोकल पकडणाऱ्या प्रवाशांनाही धुक्याचा सामना करावा लागतोय. प्लॅटफॉर्मवर उभं राहून ट्रेन कधी येतेय हे ओळखणं कठीण होतंय. त्यामुळे अनेक जण मोबाईलच्या फ्लॅशलाइटने मार्ग शोधताना दिसत आहेत.धुक्याचा परिणाम देहुरोड रेल्वे स्टेशनवरही स्पष्ट जाणवतोय. प्लॅटफॉर्मवर उभे असलेले प्रवासी धुक्यातून हळूहळू पुढे येणारी ट्रेन ओळखूच शकत नाहीत. “सकाळी लोकल पकडताना ट्रेन समोर येईपर्यंत लक्षातच येत नाही की गाडी स्टेशनात आलीय,” असा अनुभव देहुगावातील प्रवाशांनी सांगितला.
शहरातील तरुणाईनं मात्र या धुक्याला “फोटोग्राफीचा सीझन” घोषित केलंय. पिंपळे सौदागरच्या गार्डनमध्ये, पवना नदीकाठावर सकाळी धुक्यातले फोटो काढून #FoggyMorning आणि #WinterVibes हॅशटॅगसह सोशल मीडियावर पोस्ट केले जात आहेत.पवना नदीकाठ, रावेतमधील ग्रीन बेल्ट आणि किवळ्याजवळील डोंगररांगा सकाळी धुक्याच्या चादरीत लपून गेलेल्या दिसतात. काही ठिकाणी धुक्यातून डोकावणारे सूर्योदयाचे दृश्य कॅमेरात कैद करण्यासाठी तरुणाई सकाळीच फिरायला बाहेर पडत आहे.
धुके आकर्षक असलं तरी त्याचा परिणाम आरोग्यावर होतोय. सर्दी-खोकला, दमा व श्वसनाचे त्रास असलेल्या नागरिकांनी विशेष काळजी घ्यावी, असा सल्ला डॉक्टरांनी दिला आहे.धुके सुंदर वाटत असलं तरी त्याचा फटका नागरिकांना बसतोय. दमा, श्वसनाचे आजार आणि सर्दी-खोकल्याचे रुग्ण वाढण्याची शक्यता असल्याने डॉक्टरांनी काळजी घेण्याचा सल्ला दिला आहे. दुसरीकडे, वाहतूक पोलिसांनी “हेडलाइट्स सुरू ठेवा, वाहन हळू चालवा” असे आवाहन केलं आहे.
पुणे हवामान खात्यानं सांगितलं आहे की दिवस-रात्र तापमानातील फरक आणि हवेतली जास्त आर्द्रता यामुळे धुके पसरतंय. ऑक्टोबरनंतर गारवा आणखी वाढेल आणि हिवाळ्याची तीव्रता लवकर जाणवेल.
पिंपरी-चिंचवडचं आकाश सध्या धुक्याच्या चादरीत गुंडाळलं असलं तरी ही निसर्गाची अनपेक्षित भेट आहे. मात्र हिवाळ्याच्या या आगाऊ चाहुलीत नागरिकांनी सौंदर्य अनुभवताना सुरक्षितताही विसरू नये.विकासनगरपासून देहुरोडपर्यंत पसरलेलं धुकं जरी निसर्गाची अनपेक्षित भेट असली तरी त्याच्याबरोबर सावधगिरी घेणं हेच खरं शहाणपण ठरणार आहे.
