पिंपरी-चिंचवड,दि. 5 जून 2026(प्रजेचा विकास न्युज प्रतिनिधी):-पिंपरी-चिंचवड शहरात कायदा व सुव्यवस्था अबाधित राखण्यासाठी पोलीस प्रशासनाने महत्त्वपूर्ण निर्णय घेतला असून, पोलीस सहआयुक्त डॉ. शशिकांत महावरकर यांनी महाराष्ट्र पोलीस अधिनियम 1951 च्या कलम 37 (1) व (3) अन्वये विशेष प्रतिबंधात्मक आदेश जारी केले आहेत.
या आदेशानुसार, पिंपरी-चिंचवड पोलीस आयुक्तालयाच्या संपूर्ण कार्यक्षेत्रात 10 जून 2026 रोजी रात्री 12.01 वाजल्यापासून ते 23 जून 2026 रोजी मध्यरात्री 12 वाजेपर्यंत जमावबंदी लागू राहणार आहे.
आदेशानुसार कोणत्याही व्यक्तीस दाहक किंवा स्फोटक पदार्थ, दगड, शस्त्रे, तलवारी, भाले, काठ्या, बंदुका तसेच इजा पोहोचविणारी साधने बाळगण्यास मनाई करण्यात आली आहे. तसेच कोणत्याही व्यक्तीचे प्रतिकात्मक प्रेत, प्रतिमा किंवा चित्रांचे प्रदर्शन व दहन करणे, मोठ्याने घोषणा देणे, वाद्य वाजविणे, समाजात तेढ निर्माण करणारी अथवा कायदा व सुव्यवस्थेला बाधा पोहोचविणारी भाषणे करणे यावरही बंदी घालण्यात आली आहे.
याशिवाय, पाच किंवा त्यापेक्षा अधिक व्यक्तींचा जमाव करण्यास तसेच पोलीस आयुक्तांची पूर्वपरवानगी घेतल्याशिवाय सभा, आंदोलन किंवा मिरवणुका काढण्यास मनाई करण्यात आली आहे.
मात्र, शासनाच्या सेवेत असलेल्या आणि वरिष्ठांच्या आदेशानुसार कर्तव्य बजावताना शस्त्र बाळगण्याची अधिकृत परवानगी असलेल्या व्यक्तींना या आदेशातून वगळण्यात आले आहे.
पोलीस प्रशासनाने नागरिकांना आदेशाचे काटेकोर पालन करण्याचे आवाहन केले असून, आदेशाचे उल्लंघन करणाऱ्यांवर महाराष्ट्र पोलीस अधिनियम 1951 च्या कलम 135 अन्वये कारवाई करण्यात येणार असल्याचा इशारा देण्यात आला आहे.
