देहूरोड, किवळे,दि.०१ जुन २०२६ (प्रजेचा विकास न्युज प्रतिनिधी):-किवळे येथील विकास नगर,मीना काॅलनी परिसरात असलेल्या विद्याभवन (VIB’S English School) या खाजगी शाळेच्या इमारतीबाबत गंभीर प्रश्न उपस्थित होत आहेत. स्थानिक नागरिकांच्या म्हणण्यानुसार, शाळेचे बांधकाम आवश्यक परवानग्यांशिवाय करण्यात आले असून, सध्या त्या इमारतीवर आणखी एक मजला उभारण्याचे काम वेगाने सुरू आहे. त्यामुळे महानगरपालिकेच्या अनधिकृत बांधकाम विभाग, अतिक्रमण विभाग आणि संबंधित अधिकाऱ्यांच्या भूमिकेवर प्रश्नचिन्ह निर्माण झाले आहे.सद्याचे आयुक्त डाॅ.सुर्यवंशी हे कुणाला न जुमानता ठोस पावले उचलतील का? का त्या ठिकाणी अनाधिकृत बांधकाम असल्याने त्या ठिकाणी नाल्याच्या बाजूने शाळेची भिंत खचल्यास किंवा कोणताही अनुचित प्रकार घडल्यास तेथे जीवित हानी झाल्यास प्रशासनाला जाग येणार का? अशा खाजगी व्यावसायिक शाळा चालवणाऱ्यांना महापालिका प्रशासन जरब बसवणार का? असे अनेक गंभीर प्रश्न त्या ठिकाणी उपस्थित होत असून संपूर्ण शहरात या अनाधिकृत शाळेची चर्चा रंगली आहे.
स्थानिकांच्या आरोपानुसार, शाळेची इमारत नैसर्गिक वाहत्या नाल्याच्या परिसरात उभारण्यात आली असून नाल्याचे पात्र कमी करून त्यावर सीमाभिंत बांधण्यात आली आहे. त्यामुळे पावसाळ्यात पूरस्थिती निर्माण होण्याची शक्यता व्यक्त केली जात आहे.
याहूनही गंभीर बाब म्हणजे, शाळेच्या बांधकामामुळे अंडरग्राऊंड ड्रेनेज आणि गटार लाईनची अडवणूक झाल्याचा आरोप नागरिकांनी केला आहे. परिणामी परिसरात सांडपाणी साचत असून दुर्गंधी, डास आणि आरोग्याच्या समस्या निर्माण होत आहेत. अनेक वेळा तक्रारी करूनही गटार लाईन पूर्ववत करण्यात आलेली नसल्याचे नागरिकांचे म्हणणे आहे.
नागरिकांचा प्रश्न आहे की, जर बांधकाम नियमबाह्य असेल तर त्यावर कारवाई का होत नाही? आणि जर सर्व परवानग्या असतील तर त्या सार्वजनिकपणे जाहीर का केल्या जात नाहीत? शेकडो विद्यार्थ्यांच्या सुरक्षिततेचा प्रश्न असताना प्रशासनाने अद्याप कोणतीही ठोस भूमिका घेतलेली दिसत नाही.
स्थानिक नागरिकांनी पिंपरी-चिंचवड महानगरपालिकेचे आयुक्त, अनधिकृत बांधकाम नियंत्रण विभाग, अतिक्रमण विभाग, शिक्षण विभाग तसेच जिल्हा प्रशासनाने तातडीने संयुक्त पाहणी करून वस्तुस्थिती जाहीर करावी, अशी मागणी केली आहे.
नागरिकांचे थेट प्रश्न
शाळेच्या इमारतीस बांधकाम परवानगी आहे का?
इमारतीचा अधिकृत नकाशा मंजूर आहे का?
ऑक्युपन्सी सर्टिफिकेट (OC) आणि फायर NOC उपलब्ध आहे का?
नाल्याचे पात्र कमी करून बांधकाम करण्यात आले आहे का?
ड्रेनेज लाईनची अडवणूक कोणी आणि कोणाच्या परवानगीने केली?
आधी शाळेचे संपूर्ण बांधकाम अनाधिकृत आणि आत्ता सुरू असलेल्या अतिरिक्त मजल्याच्या कामासाठी परवानगी घेतली आहे का?
प्रशासनाने उत्तर द्यावे
विद्यार्थ्यांची सुरक्षितता, पर्यावरण संरक्षण आणि नागरिकांच्या मूलभूत सुविधांचा प्रश्न असताना संबंधित विभागांनी तातडीने कारवाई करून सत्य परिस्थिती जनतेसमोर आणावी, अशी मागणी जोर धरत आहे.
“नियम सर्वांसाठी समान असतील तर या शाळेच्या अनाधिकृ बांधकामावर कारवाई कधी होणार?” असा संतप्त सवाल परिसरातील नागरिक उपस्थित करत आहेत.
