पिंपरी,दि.१९ मे २०२६ (प्रजेचा विकास न्युज प्रतिनिधी):-पिंपरी चिंचवड महानगरपालिकेतील वाढ-घट उपवर्गीकरणाच्या बहुचर्चित सुमारे ६० कोटी रुपयांच्या बोगस उपसूचना प्रकरणाचा चौकशी अहवाल तातडीने जाहीर करण्यात यावा, अशी मागणी सामाजिक कार्यकर्ते मारुती भापकर यांनी केली आहे.
दि. १९ मे २०२६ रोजी मा. महापौर रवी लांडगे तसेच स्थायी समिती सभापती अभिषेक बारणे यांना दिलेल्या निवेदनात भापकर यांनी म्हटले आहे की, दि. १५ मे २०२६ रोजी झालेल्या महापालिका सभेत आयुक्त डॉ. विजय सूर्यवंशी यांनी चौकशी समितीचा अहवाल प्राप्त झाल्याचे जाहीर केले होते. तसेच तो अहवाल महाराष्ट्र शासनाकडे पुढील कारवाईसाठी पाठविण्यात आल्याची माहितीही सभागृहात देण्यात आली होती.
आयुक्तांनी हा अहवाल महापौरांकडेही सुपूर्त केला जाईल, असे स्पष्ट केल्यानंतर आज पाच दिवस उलटून गेले असून अद्याप अहवाल सार्वजनिक करण्यात आलेला नाही, असे भापकर यांनी नमूद केले आहे.
पिंपरी चिंचवड शहरातील सुमारे ३० लाख करदाते नागरिकांना या गंभीर प्रकरणातील वस्तुस्थिती समजावी, चौकशी समितीने नेमकी कोणती भूमिका घेतली हे स्पष्ट व्हावे, यासाठी महापौरांनी पत्रकार परिषद घेऊन चौकशी अहवाल जनतेसमोर खुला करावा, अशी मागणी निवेदनातून करण्यात आली आहे.
