पिंपरी-चिंचवड,दि.२१ जुलै २०२६(प्रजेचा विकास न्युज प्रतिनिधी):- अनुसूचित जातींच्या आरक्षणाच्या प्रस्तावित उपवर्गीकरणाच्या विरोधात येत्या शुक्रवार, दि. २४ जुलै २०२६ रोजी पिंपरी-चिंचवड शहरात भव्य महामोर्चाचे आयोजन करण्यात आले असून, या मोर्चाचे पोस्टर सोशल मीडियावर मोठ्या प्रमाणात व्हायरल होत आहे. शहरासह राज्यातील विविध भागांत या मोर्चाची चर्चा रंगू लागली असून, या आंदोलनात सुमारे एक लाख नागरिक सहभागी होऊ शकतात, अशी चर्चा विविध स्तरांवर सुरू आहे.
अनुसूचित जाती आरक्षण उपवर्गीकरण विरोधी संघर्ष समिती, पिंपरी-चिंचवड शहर यांच्या वतीने आयोजित या महामोर्चाचा प्रारंभ भक्तीशक्ती शिल्प, निगडी येथून सकाळी ११ वाजता होणार असून, मोर्चा अप्पर तहसील कार्यालयापर्यंत जाणार आहे.
आयोजकांनी दिलेल्या माहितीनुसार, राज्य शासनाच्या प्रस्तावित अनुसूचित जाती आरक्षण उपवर्गीकरणाला तीव्र विरोध नोंदविण्यासाठी हा मोर्चा काढण्यात येत आहे. या आंदोलनात अनुसूचित जातींतील ५९ जातींचे प्रतिनिधी आणि नागरिक मोठ्या संख्येने सहभागी होणार असल्याचा दावा करण्यात आला आहे. हा लढा कोणत्याही एका समाजापुरता मर्यादित नसून, अनुसूचित जातींचे घटनात्मक आरक्षण एकसंघ ठेवण्यासाठी असल्याचे आयोजकांनी स्पष्ट केले आहे.
“एकच निर्धार, उपवर्गीकरण हद्दपार” अशी घोषणा देत आयोजित करण्यात आलेल्या या महामोर्चातून भारतीय संविधान, सामाजिक न्याय आणि भारतरत्न डॉ. बाबासाहेब आंबेडकर यांनी दिलेल्या एकसंघ घटनात्मक आरक्षणाच्या संरक्षणासाठी लोकशाही मार्गाने आवाज उठविण्यात येणार असल्याचे आयोजकांचे म्हणणे आहे.
दरम्यान, सोशल मीडियावर व्हायरल होत असलेल्या पोस्टरमुळे आंदोलनाबाबत उत्सुकता वाढली असून, मोठ्या संख्येने नागरिक उपस्थित राहतील, अशी चर्चा शहरभर सुरू आहे. मात्र, प्रत्यक्ष उपस्थितीची संख्या मोर्चाच्या दिवशीच स्पष्ट होणार आहे.
